ⵜⵙⴽⵔ ⵎⴱⴰⵕⴽⴰ ⴱⵓⵄⵉⴷⴰ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ, ⴰⵙⵙ ⵏ ⵡⴰⵢⵏⴰⵙ 22 ⵢⵓⵍⵢⵓⵣ ⵢⴰⵜ ⵜⵉⵏⴰⵡⵜ ⵏ ⵓⵙⴳⵔ ⵏ ⵜⵉⴼⴰⵡⵜ ⵅⴼ ⵜⵙⵜⵕⴰⵜⵉⵊⵉⵜ ⵜⴰⵏⴳⵎⵓⵜ ⵜⴰⵏⵎⵏⴰⴹⵜ ⴷ ⵉⵙⴰⵡⵔⵏ ⵉⵜⵜⵓⵖⴰⵡⵙⵏ ⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵜⵎⵏⴰⴹⵜ.
ⵜⵙⵙⵏⵜⵉ ⴱⵓⵄⵉⴷⴰ ⴰⵡⴰⵍ ⵏⵏⵙ ⵙ ⵓⵙⵉⵡⵍ ⵅⴼ ⵜⵙⴽⵔⴰⵡⵉⵏ ⵜⵉⵏⴳⵎⴰ ⴳ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴰⵥⵏ ⵉⵙⴼⵓⴳⵍⵓⵜⵏ ⵏ ⵓⴽⵜⵜⵓⵢ ⵙ ⵡⴰⵎⵓⴷ ⵏ ⵓⴷⴰⴱⵓ ⴰⵎⴰⵖⵓⴷ. ⵜⵙⴷⴷⵉⴷ ⵎⴰⵙ ⴷ ⵜⴰⵙⴳⴰ ⵏ ⵓⴳⵯⵍⵎⵉⵎ, ⵙ ⵎⴰⴷ ⵉⴳⴰ “ ⵜⵉⴼⵍⵓⵜ ⵏ ⵜⵏⵣⵔⵓⴼⵜ” ⵉⴳⴰ ⵢⴰⵏ ⵓⵙⴰⵢⵔⴰⵔ ⴷ ⵢⵓⵙⴰⵏ ⵏ ⵓⵙⵉⴷⵙ ⵏ ⵢⵉⵥⵕⵉ ⵙ ⵎⴰⴷ ⵉⵥⵍⵉⵏ ⵙ ⵓⵎⴷⵢⴰ ⴰⵏⴳⵎⵓ ⴰⵎⴰⵢⵏⵓ ⴷ ⵜⵙⵏⵙⵉ ⵏⵏⵙ ⴳ ⵜⵙⴳⴳⵉⵡⵉⵏ ⵏ ⵢⵉⴼⴼⵓⵙ ⵏ ⵜⴳⵍⴷⵉⵜ.
ⵎⴽⵍⵍⵉ ⵜⵙⵙⵎⵜⵔ ⵜⵏⵙⵙⵉⵅⴼⵜ ⵏ ⵜⵎⵏⴰⴹⵜ ⵙ ⵓⵙⵏⴼⵍ ⴰⵏⴳⵎⵓ ⵎⵇⵇⵓⵔⵏ ⴳ ⵓⵙⵡⵉⵔ ⴰⵏⴰⵎⵓⵔ, ⵏⵏⴰ ⵉⴱⴷⴷⵏ ⵅⴼ ⵉⵙⵡⴰⵍⴰⵜⵏ ⵉⵙⵜⵕⴰⵜⵉⵊⵉⵢⵏ ⵢⴰⴽⴽⴰⵏ ⵜⵉⵏⴷⵉ ⵉⵥⵍⵉⵏ ⵙ ⵜⵙⴳⴳⵉⵡⵉⵏ ⵏ ⵢⵉⴼⴼⵓⵙ. ⵜⵉⵏⵉ ⵎⴰⵙ ⴷ ⴰⵥⵕⴰⵕ ⵏ ⵓⵖⴰⵡⴰⵙ ⴰⵏⵎⵏⴰⴹ ⵏ ⵓⵙⵎⴰⵔ ⴰⵎⵓⵔⴰⵏ ⵉⴳⴰ ⵢⴰⵜ ⵜⵏⴰⵜⴰⵎⵜ ⵜⴰⵙⴰⵖⵓⵍⵜ ⵉⵎⵎⴰⵍⵏ ⵉⵙⵡⴰⵍⴰⵜⵏ ⵎⵇⵇⵓⵔⵏⵉⵏ ⴳ ⵜⵙⴳⴳⵉⵡⵉⵏ ⵙ ⴽⴽⵓⵥⵜ ⵉⴹⴼⵕⵏ ⵉ ⵜⵎⵏⴰⴹⵜ.
ⴳ ⵜⵎⵔⴰⵔⵓⵜ ⵏⵏⵙ ⵅⴼ ⵜⵉⵕⵥⵉ ⵏ ⵜⴷⵔⵉⵎⵜ ⵜⴰⵥⵕⴼⴰⵏⵜ ⵉⵜⵜⵓⵥⵍⴰⵢⵏ ⵉ ⵡⵓⴳⴳⵓⴳⵏ ⵏ ⵜⵎⵏⴰⴹⵜ, ⵜⵙⵙⵉⵙⴼⵉⵡ ⴱⵓⵄⵉⴷⴰ ⵎⴰⵙ ⴷ ⵎⴰⵢⴰⴷ ⵉⵣⴷⵉ ⵙ ⵜⵎⴹⴼⵕⵜ ⵉⵥⵍⵉⵏ, ⵍⵍⵉⵖ ⵉⵜⵜⵓⵙⴽⴰⵔ ⵓⵏⵓⴹⵓ ⵏ ⵜⵎⵙⴰⵙⵜⴰⵍⵜ ⵉⵥⵍⵉⵏ ⵙ ⵡⵓⴳⴳⵓⴳⵏ ⵍⵍⵉⵖ ⴷ ⵜⴳⴳⵯⵔⴰ ⵢⴰⵜ ⵜⵉⵕⵥⵉ ⵎⵇⵇⵓⵔⵏ ⵎⵍⴰⵏ ⵜⵜ ⵜⵣⵔⴰⵡⵉⵏ ⵏⵏⴰ ⵉⴹⴼⵕⵏ ⵜⵉⵣⵔⴰⵡⵉⵏ ⵜⵉⵎⵣⵡⵓⵔⴰ, ⴰⵢⵍⵍⵉ ⵢⵉⵡⵙⵏ ⴳ ⵓⵙⵏⵖⴷ ⵏ ⵡⵓⵟⵟⵓⵏⵏ.
ⵎⴰⴷ ⵉⵥⵍⵉⵏ ⵙ ⵉⵎⴰⵖⵏ ⴳ ⵓⴳⵯⵏⵙ ⵏ ⵓⵙⵇⵇⵉⵎ, ⵜⵙⴷⴷⵉⴷ ⴱⵓⵄⵉⴷⴰ ⵎⴰⵙ ⵉⵍⵍⴰ ⵓⵙⵉⵜⵜⵉ ⵏ ⵜⵖⴰⵡⵙⴰ ⴰⴷ, ⵉⵍⵍⴰ ⵢⴰⵏ ⵓⵙⴰⴷⵎⵔ ⵙⴳ ⴷⴰⵔ ⵓⵙⵇⵇⵉⵎ ⵎⵇⵇⴰⵔ ⵍⵍⴰⵏⵜ ⵜⵉⵔⵎⵉⵜⵉⵏ ⵏ ⵓⵔⵡⴰⵢ, ⵜⴰⵎⵥ ⴳ ⵜⵉⵏⴷⵉ ⵏ ⵓⴹⴼⵓⵕ ⵏ ⵓⵍⴰⵡⴰⵢ ⵏ ⵜⴳⵎⵉ ⵏⵏⴰ ⵙ ⵜⵣⵣⵉⴳⵉⵣ ⵜⵎⴰⵣⵉⵔⵜ ⴳ ⵢⵉⴳⵔⴰⵏ ⴰⴽⴽⵯ, ⴷ ⵓⵣⵔⴰⴽ ⵏ ⵓⵣⵔⴼ ⵏ ⵜⵓⵣⵍⵜ ⴳ ⵓⵙⵉⵡⵍ ⵅⴼ ⵉⵎⵏⴰⴷ ⵏⵏⵙ ⵙ ⵜⵍⴻⵍⵍⵉ.
ⵎⴰⴷ ⵉⵥⵍⵉⵏ ⵙ ⵓⵙⵓⴷⵔⵙ ⵏ ⵓⵥⵍⴰⵢ ⴷ ⵉⵏⵓⵃⵢⵓⵜⵏ ⵉⴼⵔⴽⴰⵏⵏ, ⵜⵙⵙⵉⵙⴼⵉⵡ ⵎⴰⵙ ⴷ ⴳ ⵓⵙⴰⵜⵉ ⵏ ⵜⵎⴰⵖⵓⵏⵜ ⵉⵍⵍⴰⵏ ⴳⵔ ⵓⵡⴰⵏⴽ ⴷ ⵜⵎⵏⴰⴹⵜ, ⵉⵜⵜⵓⵙⵖⵉⵡⵙ 37 ⵏ ⵓⵙⵏⵜⵉ ⴳ ⵢⵉⴳⵔⴰⵏ ⴰⴽⴽⵯ, ⵎⵇⵇⴰⵔ ⵜⵉⴳⴳⵉ ⵏⵏⵙ ⴰⵔ ⵉⴼⵜⵜⵓ ⵙ ⵜⵡⴰⴷⴰ ⵓⵔ ⵉⴳⵉⵏ ⵢⴰⵜ ⴰⵢⵍⵍⵉ ⵉⵙⴱⴱⴰⵢⴹⴰⵕⵏ ⵜⴰⵎⵔⵏⵉⵡⵜ ⵏ ⵉⵙⵏⵜⴰⵢ ⴰⴷ.
ⵜⵔⵏⵓ ⵎⴰⵙ ⴷ ⵉⵙⵏⵜⴰⵢ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⵖⵓⵔⵙ ⵢⴰⵜ ⵜⴰⵡⵉⵜ ⵉⵅⴰⵜⵔⵏ, ⴷ ⵜⵉⵍⵉⵜ ⵏ ⵜⵓⴳⵜⵜ ⵏ ⵜⵎⵙⵙⵓⵔⵉⵏ ⵏⵏⴰ ⵉⵙⵖⵍⵍⴰⵏ ⴳ ⵢⵉⴳⵔ ⴰⴷ. ⵜⵙⴷⴷⵉⴷ ⵎⴰⵙ ⴷ ⵜⴰⵎⵏⴰⴹⵜ ⴷⴰ ⵜⵙⵡⵓⵔⵉ ⵅⴼ ⵓⵙⵏⴼⵍ ⵏ ⵜⴷⵎⵙⴰ ⵜⴰⴷⵖⵔⴰⵏⵜ ⵃⵎⴰ ⴰⴷ ⵜⴹⴼⵕ ⵜⴰⵎⵔⵏⵉⵡⵜ ⵜⴰⵏⴳⵎⵓⵜ ⴳ ⵢⵉⴳⵔⴰⵏ ⴰⴽⴽⵯ, ⵖ ⵏⵉⵜ ⵍⵍⴰⵏⵜ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ.
ⵜⴳⴰ ⵜⵉⵏⴰⵡⵜ ⵜⴰⵏⵖⵎⴰⵙⵜ ⵢⴰⵜ ⵜⵕⵉⵕⴹⵜ ⵏ ⵉⵏⵖⵎⴰⵙⵏ ⵃⵎⴰ ⴰⴷ ⵙⵏⴼⵍⵏ ⵜⵉⵡⵏⴳⵉⵎⵉⵏ ⵙⵔⵙⵏ ⵉⵙⵇⵙⵉⵜⵏ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⵓⵊⴷ ⵏ ⵓⵎⵍⴰⵏ ⵏⵖⴷⵏⵉⵏ ⴷ ⵖⵓⵔ ⵜⴰⴼⵍⵙⵜ ⵉ ⵜⵏⵖⵎⴰⵙⵜ ⵜⴰⴷⵖⵔⴰⵏⵜ ⴷ ⵜⵏⴰⵎⵓⵔⵜ, ⴷ ⵉⵏⵏⴰⵍ ⵜⵓⴳⴳⴰⵙ ⵉⵜⵜⵓⴼⴽⴰⵏ ⴳ ⵓⵙⴷⵓⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⴳ ⵜⵎⵏⴰⴹⵜ.