ⵜⴰⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ ⵜⵥⵍⵉ ⵙ ⵓⵎⵣⵔⵓⵢ ⴰⵇⴱⵓⵔ ⵏⵏⴰ ⵉⵣⴷⵉⵏ ⵙ ⵡⴰⵏⵙⴰ ⵏⵏⵙ ⴰⵊⵢⵓⴳⵕⴰⴼⵉ ⴰⵙⵜⵕⴰⵜⵉⵊⵉ ⵏⵏⴰ ⵜⵜ ⵢⵓⵊⵊⴰⵏ ⵙⴳ ⵉⵣⵎⴰⵣ ⴷ ⵢⴰⵏ ⵓⴳⵔⴱⵔⵉⴷ ⵏ ⵜⵖⵔⵎⵉⵡⵉⵏ ⴷ ⵢⴰⵏ ⵡⴰⵎⵎⴰⵙ ⵏ ⵓⵙⵏⴼⵍ ⴰⵙⵖⵏⵣⵉ ⴷ ⵓⴷⵍⵙⴰⵏ ⴳⵔ ⵢⵉⵥⵥⵍⵎⴹ ⵏ ⵍⵎⵖⵔⵉⴱ ⴷ ⵢⵉⴼⴼⵓⵙ ⵏⵏⵙ. ⵙⴳ ⵜⴰⵙⵓⵜⵉⵏ ⵜⴽⴽⴰ ⵜⵜ ⵉⵏⵏ ⵜⵙⴳⴰ ⴷ ⵢⴰⵏ ⵓⵙⵔⵙ ⴰⴷⵙⵍⴰⵏ ⵏ ⵉⴽⴰⴱⴰⵕⵏ ⵉⵙⵖⵏⵣⵉⵜⵏ ⵏⵏⴰ ⵉⵣⴷⴷⵉⵏ ⵍⵎⵖⵔⵉⴱ ⵙ ⵜⴷⵔⵓⵜ ⵏ ⵜⴼⵔⵉⵇⵜ, ⴷ ⵜⴱⵓⵖⵍⵓ ⵙ ⵜⵡⵉⵙⵉ ⵏ ⵜⵎⵍⴰⵍⵜ ⴰⵎ ⵜⵉⵏⴷⵔⵜ ⵏ ⵓⵣⴷⴰⵢ ⴳⵔ ⵜⵖⵔⵎⵉⵡⵉⵏ ⵏ ⵍⵎⵖⵔⵉⴱ ⴰⵎⵇⵇⵔⴰⵏ ⴷ ⵜⴼⵔⵉⵇⵜ ⵉⴼⴼⵓⵙ ⵏ ⵜⵏⵣⵔⵓⴼⵜ.
ⴰⵙⵖⵏⵣⵉ ⴳ ⵜⵙⴳⴰ ⵏ ⵡⴰⴷ ⵏⵓⵏ:
ⵜⵥⵕⴰ ⵜⵙⴳⴰ ⵏ ⵡⴰⴷ ⵏⵓⵏ ⵙⴳ ⵓⵎⵣⵔⵓⵢ ⵏⵏⵙ, ⵙ ⵓⵎⴷⵔⵓⵙ ⵙⴳ ⵓⴽⵛⵛⵓⵎ ⵏ ⵉⵎⵓⵙⵍⵎⵏ ⵙ ⵢⵉⵥⵥⵍⵎⴹ ⵏ ⵜⴼⵔⵉⵇⵜ, ⵢⴰⵏ ⵓⵏⵏⵓⵛⴳ ⵎⵇⵇⵓⵔⵏ ⴳ ⵓⴱⵓⵖⵍⵓ ⴰⵙⵖⵏⵣⵉ ⵙⴳ ⵉⴳⵎⵎⵓⴹⵏ ⵏ ⵢⵉⵥⵥⵍⵎⴹ ⴷ ⵢⵉⴼⴼⵓⵙ ⵏ ⵜⴰⴳⵓⵜ ⵏ ⵜⵏⵣⵔⵓⴼⵜ ⵙ ⵜⵡⵉⵍⴰ ⵜⵓⵙⵍⵉⴳⵜ ⴷ ⵜⵏⵣⵔⵓⴼⵜ ⵜⴰⵅⴰⵜⴰⵔⵜ ⵙ ⵜⵡⵉⵍⴰ ⵜⴰⵎⴰⵜⴰⵢⵜ. ⵜⵙⴽⵔ ⵜⵙⴳⴰ ⵜⵉⵣⴷⴰⵢⵉⵏ ⵉⴷⵓⵙⵏ ⴷ ⵙⵙⵓⴷⴰⵏ ⵏ ⵜⴰⴳⵓⵜ, ⵜⵙⵙⴱⵖⵔ ⵙⴳ ⵡⴰⴳⵍⴰ ⴰⵏⴼⴳⴰⵏ ⴷ ⵓⵎⵖⵓⵣⴰⵏ ⴷ ⵓⵎⵓⴷⵔⴰⵏ ⴷ ⵓⵎⵙⵉⵛⴽⴰⵏ ⴰⴽⴷ ⵉⵏⴳⵔⴰⵡⵏ ⵉⵙⵔⵜⴰⵏⵏ ⵏⵏⴰ ⵉⵜⵜⵓⵙⴽⴰⵔⵏ ⴳ ⵜⵙⴳⴰ; ⵏⵏⴰ ⵜⵜ ⵢⵓⵊⵊⴰⵏ ⴰⴷ ⴳⵉⵏ ⵉⵙⵉⵣⵡⵔⵏ ⵏⵏⵙ ⴰⴼⵔⴰⴳ ⵏ ⵓⴱⵓⵖⵍⵓ ⴰⵙⵖⵏⵣⵉ ⴳ ⵜⴰⴳⵓⵜ ⵏ ⵜⵏⵣⵔⵓⴼⵜ ⴷ ⵓⴼⵔⴰⴳ ⵏ ⵉⵙⵓⴳⴰⵎ ⵏⵏⵙ ⴳ ⵙⵙⵓⴷⴰⵏ ⵏ ⵜⴰⴳⵓⵜ,ⵙⴳ ⵓⵎⴰⵜⵔ ⵏ ⵉⴱⵔⴷⴰⵏ ⵉⵎⵙⵖⵏⵣⵉⵜⵏ ⵏⵏⴰ ⴷ ⵉⴽⴽⴰⵏ ⵡⴰⴷ ⵏⵓⵏ ⴷ ⵏⵏⴰ ⵙⵉⵙ ⵉⵜⵜⴰⵡⵉⵏ. ⵜⴳⴰ ⵜⵣⴷⴰⵢⵜ ⴰⴷ ⵉⴷⵓⵙⵏ ⴳⵔ ⵜⵏⵓⴷⴰⴼ ⵏ ⵓⵙⵖⵏⵣⵉ ⴰⵏⵣⵔⵓⴼ ⴷ ⵜⵙⵓⵍⵜ ⵏ ⵉⵏⴳⵔⴰⵡⵏ ⵉⵙⵔⵜⴰⵏⵏ ⴳ ⵜⵙⴳⴰ ⵣⵣⵖ ⵓⴱⴷⴷⵉ ⵏ ⵓⵡⴰⵏⴽ ⴰⵎⵕⵉⴱⵟ ⴰⵔ ⵜⵉⵣⵉ ⵏ ⵓⵡⴰⵏⴽ ⴰⵄⴰⵍⴰⵡⵉ.
ⴰⵙⵉⵡⵍ ⵅⴼ ⵓⵙⵖⵏⵣⵉ ⴳ ⵜⵙⴳⴰ ⵏ ⵡⴰⴷ ⵏⵓⵏ ⵉⵙⵖⴰⵡⵙⴰ ⴰⴱⴷⴰⵔ ⵏ ⵜⵎⵍⴰⵍⵜ ⵏⵏⴰ ⵜⵜⴳⴳⵏⵜ ⵜⵖⵔⵎⵉⵏ ⵏ ⵜⵙⴳⴰ ⴳ ⵢⵉⴳⵔ ⴰⴷ, ⴰⴷ ⵏⴱⴷⵔ ⵜⵉⵖⵔⵎⵜ ⵏ ⵏⵓⵍ ⵍⴰⵎⵟⴰ ⵏⵏⴰ ⴷ ⵢⵓⴳⴳⴰⵏ ⴳ ⵜⴰⵙⵓⵜ ⵜⴰⵀⵉⵊⵔⵉⵜ ⵜⵉⵙ ⵙⵎⵎⵓⵙⵜ/11 ⵏ ⵜⵍⴰⵍⵉⵜ ⵏ ⵍⵎⴰⵙⵉⵃ ⴰⴽⴷ ⵉⵎⵕⴰⴱⵟⵏ, ⴹⴰⵕⵜ ⵏⵏⵙ ⵜⴰⴳⴳⴰⵡⵙⵜ ⵏⵏⴰ ⵉⵙⵙⵏⵜⵉⵏ ⴰⵔ ⴷ ⵜⴻⵜⵜⴰⴳⴳⴰ ⴳ ⵢⴰⵜ ⵜⵊⵓⵎⵎⴰ ⵙⴳ ⵜⴰⵙⵓⵜ ⵜⴰⵀⵉⵊⵔⵉⵜ ⵜⵉⵙ ⵙⴰ ⵉⵎⵙⴰⵙⴰⵏ ⴷ ⵜⵉⵙ 13 ⵏⵜⵍⴰⵍⵉⵜ ⵏ ⵍⵎⴰⵙⵉⵃ, ⴳ ⵓⵎⴳⴳⴰⵔⵓ ⵜⵉⵖⵔⵎⵜ ⵏ ⵓⴳⵯⵍⵎⵉⵎ ⵏⵏⴰ ⵢⵓⵎⵥⵏ ⴰⵙⴰⴼⵓ ⵜⵙⵙⵏⵜⵉ ⴰⵔ ⴷ ⵜⵎⵎⴰⵍ ⵜⵉⵏⴷⵉ ⵏⵏⵙ ⵜⴰⵙⵖⵏⵣⵉⵜ ⵙⴳ ⵜⴰⵙⵓⵜ ⵜⵉⵙ 18, ⵙⵍⴰⵡⴰⵏ ⴰⴽⴽⵯ ⴳ ⵜⴰⵙⵓⵜ ⵜⵉⵙ 19. ⵙⴳ ⵜⴼⵔⵉⵙⵉⵏ ⵜⵉⵅⴰⵜⴰⵔⵉⵏ ⵏ ⵜⵖⵔⵎⵉⵏ ⴰⴷ ⵎⴰⵙ ⵜⵜ ⵉⵏⵏ ⴽⴽⴰⵏⵜ ‘’ ⴳⴰⵏⵜ ⵉⵙⵔⴰⵙ ⵉⴱⵔⴰⴷⵏⵏ ⵙ ⵜⵏⵉⵍⴰ ⵏ ⵜⴼⵔⵉⵇⵜ ⵉⴼⴼⵓⵙ ⵏ ⵜⵏⵣⵔⵓⴼⵜ, ⴳⵉⵏⵜ ⴰⴱⵔⵉⴷ ⵏ ⵉⴽⴰⴱⴰⵕⵏ ⵉⵏⵣⵔⵓⴼⵏ ⵙⴳ ⴷ ⴰⵔ ⴹⴰⵕⵜ ⵏ ⵜⵏⵣⵔⵓⴼⵜ ⴰⵡⵉⵏ ⴷⵉⵙⵏ ⵜⵉⵏⵣⵣⵓⵜⵉⵏ ⴷ ⵜⵡⵏⴳⵉⵎⵉⵏ’’. ⵎⴽⵍⵍⵉ ⵜⵜⴳⴳⵏⵜ ⵜⵖⵔⵎⵉⵏ ⵏ ⵜⵙⴳⴰ ⵢⴰⵜ ⵜⵎⵍⴰⵍⵜ ⵜⴰⵎⵣⵡⴰⵔⵜ ⴼ ⴰⴷ ⵜⴰⵊⵊ ⴰⵙⵖⵏⵣⵉ ⵏ ⵜⵏⵣⵔⵓⴼⵜ ⴷ ⴰⵎⵓⵖⵍ ⵙⴳ ⵉⵎⵓⵖⵍⵏ ⵉⵅⴰⵜⴰⵔⵏ ⵏ ⵓⵙⵖⵏⵣⵉ ⵏ ⵢⵉⵍⵍ ⴰⵏⴰⵎⵎⴰⵙ ⴳ ⵓⵣⵎⵣ ⴰⵎⴰⵣⴰⵏ, ⴷ ⵉⴼⵜⴰⵙⵏ ⵏ ⵓⴳⴰⵔⵓ ⴰⵟⵍⴰⵏⵟⵉ ⴳ ⵓⵣⵎⵣ ⴰⵎⴰⵢⵏⵓ ⴷ ⵓⵜⵔⴰⵔ ⵜⴼⴽ ⵓⵜⵛⵉ ⵉ ⵜⵎⴰⵥⵓⵏⵉⵏ ⵜⵉⵅⴰⵜⴰⵔⵉⵏ ⵜⵉⵏⴰⵎⵓⵔⵉⵏ ⵣⵓⵏ ⴷ ⵎⵕⵕⴰⴽⵛ ⴷ ⴼⴰⵙ ⴷ ⵜⵉⵢⵢⴰⴹ. ⵜⵣⴷⵉ ⵜⵙⴳⴰ ⴰⴽⴷ ⵜⵖⵔⵎⵉⵏ ⵏ ⵜⴰⴳⵓⵜ ⵏ ⵜⵏⵣⵔⵓⴼⵜ ⴷ ⵙⵙⵓⴷⴰⵏ ⵏ ⵜⴰⴳⵓⵜ ⵙ ⵢⴰⵜ ⵜⴳⵔⵓⵎⵎⴰ ⵏ ⵉⴱⵔⴷⴰⵏ ⵉⵙⵖⵏⵣⵉⵜⵏ ⵏⵏⴰ ⵉⵏⵏⵓⴹⵚⵏ ⵙ ⵉⵙⵏⴼⴰⵍ ⵉⴷⵎⵙⴰⵏⵏ, ⴷ ⵜⵇⴱⵉⵍⵜ ⴷ ⵓⵙⴳⴷⴰⵏ ⴷ ⵓⴷⵍⵙⴰⵏ ⴷ ⵓⵙⵔⵜⴰⵏ.
ⵉⴳⴰ ⵓⴳⴰⴷⴰⵣ ⵏ ⵓⵎⵃⴰⵢⵔⵉⵛ ⴳ ⵜⵖⵔⵎⵜ ⵏ ⵓⴳⵯⵍⵎⵉⵎ, ⵙⴳ ⵓⴳⴳⴰⵔ ⵏ ⴽⵕⴰⴹⵜ ⵜⴰⵙⵓⵜⵉⵏ, ⵢⴰⵏ ⵡⴰⵎⵎⴰⵙ ⴰⴷⵎⵙⴰⵏ ⴰⵅⴰⵜⴰⵔ ⴷ ⵓⵙⴰⵢⵔⴰⵔ ⴰⵎⵙⵖⵏⵣⵉ ⵉⵜⵜⵓⵙⵙⴰⵏⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⵢⵓⵎⵥ ⵢⴰⵜ ⵜⵊⵓⵎⵎⴰ ⵢⵓⵜⵉⵏ ⴽⵕⴰⴹ ⵉⵀⵉⴽⵟⴰⵕⵏ.
ⴷⴰ ⵉⵥⵕⵕⴰ ⵓⴳⴰⴷⴰⵣ ⴰⴷ, ⵏⵏⴰ ⵉⴳⴰⵏ ⵢⴰⵏ ⵙⴳ ⵉⴳⴰⴷⴰⵣⵏ ⵉⵣⴰⵢⴽⵓⵜⵏ, ⵢⴰⵏ ⵜⵉⵍⴰⵍⵜ ⵜⴰⵙⵖⵏⵣⵉⵜ ⴷⴰ ⴷⵉⴳⵙ ⵜⵜⵓⴼⵙⴰⵔⵏⵜ ⵜⵎⵔⴰⵡⵉⵏ ⵏ ⵡⵓⵍⵍⵉ ⴷ ⵡⴰⵖⴰⴹⵏ ⵙ ⵡⴰⵏⴰⵡⵏ ⵏⵏⵙⵏ ⴰⴽⴽⵯ, ⴷ ⵢⴰⵏ ⵓⵙⴰⵢⵔⴰⵔ ⴰⵎⴰⵢⵏⵓ ⵏ ⵓⵣⵣⵏⵣ ⵏ ⵓⴳⵓⵎⵎⴰ ⴷ ⵉⵛⴰⴽⴰⵏ ⴷ ⵉⵎⵏⴷⵉ.
ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵏⴱⵖⵓⵔⵜ ⴷ ⵜⵎⵢⴰⵏⴰⵡⵜ :
