ⵉⴷⴷⴰ ⴷ ⵓⵖⴰⵡⴰⵙ ⵏ ⵓⵙⵓⴷⵔⵙ ⵏ ⵉⵎⵢⴰⴳⴰⵔⵏ ⵉⵎⵓⵔⴰⵏⵏ ⴷ ⵉⵏⴰⵎⵓⵏⵏ ⵙ ⵓⵣⵣⴳⵉⵔ ⵏ ⵜⴰⵔⴰⵜⵉⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⵃⵎⴰ ⴰⴷ ⵢⵉⵍⵉ ⵓⵙⵓⴷⵔⵙ ⵏ ⵉⵎⵢⴰⴳⴰⵔⵏ ⵉⵎⵓⵔⴰⵏⵏ ⴳ ⵎⴰⴷ ⵉⵥⵍⵉⵏ ⵙ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵉ ⵓⵙⵓⴼⵖ ⵙⴳ ⵓⵥⵍⴰⵢ ⴷ ⵡⴰⴷⴰⴼ ⵖⵔ ⵜⵏⵓⴼⴰ ⵜⵉⴷⵙⵍⴰⵏⵉⵏ (ⵉⴱⵔⴷⴰⵏ, ⵉⵙⵓⴽⴰ, ⴷ ⵜⵎⴰⴷⴷⵓⵜⵉⵏ ⵜⵉⵥⵓⵕⴰⵏⵉⵏ ⴷ ⵓⵙⵍⵎⴷ, ⴷ ⵡⴰⵎⴰⵏ ⵏ ⵜⵉⵙⵙⵉ ⴷ ⵓⵥⴰⵕⵓⵕ) ⵉ ⵓⵙⵖⵓⴷⵓ ⵏ ⵜⵎⵙⵓⵜⴰⵍ ⵏ ⵜⵓⴷⵔⵜ ⵏ ⵉⵎⵣⴷⴰⵖⵏ ⴳ ⵢⵉⴳⵔ ⵉⵜⵜⵓⵙⵡⵓⵜⵜⵙⵏ ⴷ ⵓⵙⵣⵎⵔ ⵏⵏⵙⵏ ⵙⴳ ⵓⵙⵙⴱⵖⵔ ⵙⴳ ⵡⴰⴳⵍⴰ ⴰⴳⴰⵎⴰⵏ ⴷ ⵓⴷⵎⵙⴰⵏ ⵏ ⵜⵙⴳⴳⵉⵡⵉⵏ ⴰⴷ.
ⵉⴱⴷⴷ ⵓⵖⴰⵡⴰⵙ ⴰⴷ ⵅⴼ ⵓⵎⵏⵣⴰⵢ ⵏ ⵜⵎⵙⴰⴳⴰⵔⵜ ⴷ ⵓⵙⴳⵓⴷⵉ ⵏ ⵜⵓⴳⴳⴰⵙ ⴷ ⵜⴷⵔⴰⵡⵜ ⴳⵔ ⵢⵉⴳⵔⴰⵏ ⵉⵎⴰⵡⵙⴰⵙⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⵜⵉⵎⵏⵜⴰⵢⵉⵏ ⵅⴼ ⵢⵉⴳⵔⴰⵏ ⵢⴰⴽⵙⵓⵍ,. ⴷ ⵉⴱⴷⴷ ⵅⴼ ⵓⵎⵏⵣⴰⵢ ⵏⵜⵎⴰⵙⴰⵢⵜ ⵏ ⵓⵙⵡⵉⵔ ⴰⵏⵎⵏⴰⴹ ⵉ ⵓⵙⵡⵓⵜⵜⵓ ⵏ ⵉⵙⵉⵣⵡⵔⵏ ⴷ ⵓⵙⵔⵓⵙ ⵏ ⵉⵙⵏⵜⴰⵢ ⵉ ⵓⵙⴷⵓⵙ ⵏ ⵜⵏⵏⵓⵣⵖⴰ ⵏ ⵢⵉⴳⵔⴰⵏ ⵉⵜⵜⵓⵙⵡⵓⵜⵜⵙⵏ. ⵍⴰ ⵉⵙⵎⴷⵢⴰ ⵢⴰⵏ ⵓⴳⵣⵣⵓⵎ ⴰⴷⵙⵍⴰⵏ ⵙⴳ ⵜⵓⴳⴳⴰⵙ ⵉⵜⵜⵓⴼⴽⴰⵏ ⵉ ⵓⵍⴽⴰⵎ ⵏ ⵜⴳⵎⵉ ⵜⴰⵖⵥⵓⵕⴰⵏⵜ ⴷ ⵜⵎⵢⴰⵙⴰⵏⵜ ⴳⵔ ⵜⵙⴳⴳⵉⵡⵉⵏ ⵜⵉⵖⵔⵎⴰⵏⵉⵏ ⴷ ⵜⴼⴰⵔⴰⵏⵉⵏ.
ⴳ ⵓⵙⴰⵜⵉ ⵏ ⵓⵣⵣⴳⵉⵔ ⵏ ⵜⵉⵔⵎⵜ ⵏⵏⵙ ⵙⴳ ⵓⵖⴰⵡⴰⵙ ⵏ ⵓⵡⵜⵜⵓ ⵙⴳ ⵉⵎⵢⴰⴳⴰⵔⵏ ⵉⵎⵓⵔⴰⵏⵏ ⴷ ⵉⵏⴰⵎⵓⵏⵏ, ⵉⵥⵍⵉ ⵓⵙⵇⵇⵉⵎ ⵏ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ ⵎⴰⴷ ⵉⴳⴰⵏ 660 ⵎⵍⵢⵓⵏ ⵏ ⵉⴷⵔⵀⵎⵏ ⴳⵔ 2018 ⴷ 2022 ⵉ ⵓⵣⵣⴳⵉⵔ ⵏ ⵉⵙⵏⵜⴰⵢ ⵉⵎⵏⵏⴰⵡⵏ ⴳ 5 ⵢⵉⴳⵔⴰⵏ ⵉⴷⵙⵍⴰⵏⵏ ⵓⵎⴰⵏⵜ ⵉⴱⵔⴷⴰⵏ, ⴰⵥⴰⵕⵓⵕ, ⴰⵎⴰⵏ ⵏ ⵜⵉⵙⵙⵉ, ⵜⴰⴷⵓⵙⵉ, ⴰⵙⵍⵎⴷ. ⵉⵙⵙⴰⵔⵓⵜⵏ ⴰⴷ ⴷⴷⴰⵏ ⴷ ⵙ ⵓⵙⴰⴷⵎⵔ ⵏ ⵡⴰⵙⵙⴰⵔⵏ ⵉⵏⴼⵜⴰⵍⵏ ⵏ ⵜⵙⴳⴳⵉⵡⵉⵏ ⵜⵉⴼⴰⵔⴰⵏⵉⵏ ⴷ ⵜⴳⵔⴰⵡⵉⵏ ⵉⵙⵙⴱⵖⵔⵏ ⵏⵏⴰ ⵉⵍⴽⵎ 50 ⵏ ⵜⴳⵔⴰⵡⵜ, ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⵖⵓⴷⵓ ⵏ ⵜⵎⵙⵓⵜⴰⵍ ⵏ ⵜⵓⴷⵔⵜ ⵉ ⵉⵎⵣⴷⴰⵖⵏ ⵏ ⵜⵙⴳⴳⵉⵡⵉⵏ ⴰⴷ.
