ⴰⵖⴰⵡⴰⵙ ⵏ ⵜⴳⵎⵉ ⵜⴰⵏⵎⵏⴰⴹⵜ 2022- 2027

ⵍⴰ ⵜⵙⵇⵇⵔ ⵜⵙⵜⵕⴰⵜⵉⵊⵉⵜ ⵙ ⵓⵎⴰⵟⵍ ⵏ ⴽⵔⴰ ⵏ ⵉⵙⵏⵜⴰⵢ ⴳ ⵜⵎⵏⴰⴹⵜ, ⴰⵔ ⵜⴱⴱⴰⴳ ⴰⴷ ⵜⵏ ⵜⵙⵎⴽⵍ ⵙ ⵜⴰⵣⵣⴰⵣⵜ, ⵃⵎⴰ ⴰⴷ ⵜⵙⵙⵉⵏⴼ ⵢⵉⴹⵉⵚ ⵓⴷⵉⵔ ⵅⴼ ⵜⴳⵎⵉ. ⵍⴰ ⵉⵙⵎⴷⵢⴰ ⵓⵡⵜⵜⴰⵙ ⴳ ⵓⵙⴳⵓⴷⵉ ⵏ ⵜⵓⴳⴳⴰⵙ ⵉ ⵓⵙⵎⴰⴷ ⵏ ⵉⵙⵏⵜⴰⵢ ⵉⵎⴰⴷⴷⴰⵔⵏ ⵏⵏⴰ ⵓⵔ ⵉⵜⵜⵓⵙⴽⴰⵔⵏ ⴳ ⵜⵉⵣⵉ ⵏⵏⵙ ⴷ ⵢⵓⵙⴰⵏ, ⵣⵓⵏ ⴷ ⴰⵙⵖⵓⴷⵓ ⵏ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ, ⴷ ⵓⵙⴱⵓⵖⵍⵓ ⵏ ⵜⵙⴳⴳⵉⵡⵉⵏ ⵏ ⵜⵎⴰⵣⵉⵔⵜ, ⴷ ⵓⴹⴰⴽⴰⵍ ⵏ ⵡⴰⵡⴰⴹ ⵏ ⵜⵏⵓⴼⴰ ⵜⵉⴷⵙⵍⴰⵏⵉⵏ ⵉ ⵉⵎⵣⴷⴰⵖⵏ ⴰⴽⴽⵯ.

ⵍⴰ ⵜⵙⵎⵙⵙⵉ ⵜⵔⵙⵍⵜ ⴰⴷ ⵜⵍⴽⵎ ⵜⴰⵣⵔⴼⵜ ⵜⴰⵏⴰⵎⵓⵏⵜ ⵙⴳ ⵓⵙⵖⵓⴷⵓ ⵏ ⵡⴰⵡⴰⴹ ⵏ ⵉⵎⵣⴷⴰⵖⵏ ⵖⵔ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵜⵉⴷⵙⵍⴰⵏⵉⵏ ⵣⵓⵏ ⴷ ⴰⵙⵍⵎⴷ, ⵜⴰⴷⵓⵙⵉ, ⴰⵎⴰⵏ ⵏ ⵜⵉⵙⵙⵉ, ⴷ ⵓⵥⴰⵕⵓ. ⵜⵡⴰⵜⵜⵙ ⴰⵙⴷⵓⵙ ⵏ ⵓⵙⵉⴷⴼ ⴰⵏⴰⵎⵓⵏ ⵏ ⵜⴳⵔⵓⵎⵎⵉⵏ ⵔⵛⴰⵏⵉⵏ, ⴷ ⵓⵙⵓⵊⴷ ⵏ ⵜⵡⵏⵏⴰⴹⵜ ⴷ ⵢⵓⵙⴰⵏ ⵉⴼⵔⵔⵓⵏ ⴰⵏⴳⵉⴷⴷⵉ ⵏ ⵜⵎⵍⴷⴰ ⵉ ⵓⴼⵔⵉⴷⵏ ⴰⴽⴽⵯ ⵏ ⵡⴰⵎⵓⵏ. ⵎⴽⵍⵍⵉ ⵉⴱⴱⴰⴳ ⵓⵖⴰⵡⴰⵙ ⴰⴷ ⵉⵙⴽⵔ ⴽⵉⴳⴰⵏ ⵏ ⵜⵎⵍⴷⴰ ⵜⵉⴷⵎⵙⴰⵏⵉⵏ ⴷ ⵓⵙⴷⵓⵙ ⵏ ⵓⵙⵉⴷⴼ ⴰⵏⴰⵎⵓⵏ ⵙⴳ ⵓⵣⵣⴳⵉⵔ ⵏ ⵉⵙⵏⵜⴰⵢ ⵏ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ ⵜⴰⵏⴰⵎⵓⵏⵜ.

ⴰⵔ ⵜⵙⵏⴰⵍ ⵜⵔⵙⵍⵜ ⴰⴷ ⵅⴼ ⵓⵙⵖⵍⵍⴰ ⵏ ⵜⵥⴹⴰⵕⵉⵏ ⵜⵉⴷⵎⵙⴰⵏⵉⵏ ⵜⵉⴳⴰⵎⴰⵏⵉⵏ ⴷⵜⵏⴼⴳⴰⵏⵉⵏ ⵏⵏⴰ ⵉⵍⵍⴰⵏ ⴷⴰⵔ ⵜⵎⵏⴰⴹⵜ, ⴷ ⵓⵙⵎⵙⵙⵉ ⵅⴼ ⵜⵙⵓⵍⵜ ⵏ ⵜⵥⴹⴰⵕⵉⵏ ⴰⴷ ⵉ ⵓⴹⴰⴽⴰⵍ ⵏ ⵜⵙⵓⵍⵜ ⵏ ⵜⵎⵔⵡⵏⵉⵜ ⵜⴰⴷⵓⵙⴰⵏⵜ ⴳ ⵜⵉⵣⵉ ⵢⴰⴳⴳⵓⵏ, ⵜⵓⵎⴰ ⵜⵔⵙⵍⵜ ⴰⴷ ⴰⵙⴱⵓⵖⵍⵓ ⵏ ⵢⵉⴳⵔⴰⵏ ⵉⵎⴰⴷⴷⴰⵔⵏ ⵣⵓⵏ ⴷ ⵜⴰⴳⴰⵢⴽⴰ, ⵜⴰⴳⵎⵔⵜ ⵜⴰⵢⵍⴰⵏⵜ, ⵜⴰⵎⴰⵍⵍⴰⵢⵜ ⵜⴰⵙⵓⵍⴰⵏⵜ, ⵜⴰⵣⵣⵓⵍⵉⵏ ⵜⵉⵇⴱⵓⵔⵉⵏ, ⴷ ⵓⵙⴷⵓⵙ ⵏ ⵉⵙⵍⵍⵡⵉ ⴷ ⵜⵎⵣⵡⴰⵔⵜ ⵏ ⵜⵡⵓⵔⵉⵡⵉⵏ. ⴰⵡⵜⵜⴰⵙ ⴷ ⴰⵙⵏⴼⵍ ⵏ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ ⵖⵔ ⵢⴰⵏ ⵉⴳⵊⴷⵉ ⴰⴷⵎⵙⴰⵏ ⵉⵙⵙⴷⵓⵙⵏ ⵜⵉⵎⵍⴷⴰ ⵏ ⵜⵡⵓⵔⵉ ⵢⴰⵡⵙ ⴳ ⵜⵙⵔⵉ ⵜⴰⴷⵎⵙⴰⵏⵜ ⵜⴰⴷⵖⵔⴰⵏⵜ ⴷ ⵜⵏⴰⵎⵓⵔⵜ.

ⵉⴳⴰ ⵓⵙⵏⴼⵍ ⵖⵔ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⵢⴰⵏ ⵉⴳⵊⴷⵉ ⴰⴷⵙⵍⴰⵏ ⴳ ⵢⵉⵥⵕⵉ ⵏ ⵜⴳⵎⵉ ⵜⴰⵏⵎⵏⴰⴹⵜ, ⵍⵍⵉⵖ ⵜⵎⵎⴰⵖ ⵜⵎⵏⴰⴹⵜ ⴰⴷ ⵜⴳ ⵉⴳⵊⴷⵉ ⴰⵏⴰⵎⵓⵔ ⴰⵎⵣⵡⴰⵔ ⴳ ⵓⴼⴰⵔⵙ ⵏ ⵜⵥⴹⴰⵕⵜ ⵜⴰⵣⴳⵣⴰⵡⵜ. ⵔⴰⴷ ⵜⵙⵎⵙⵙⵉ ⵜⵔⵙⵍⵜ ⴰⴷ ⵅⴼ ⵓⵙⴱⵓⵖⵍⵓ ⵏ ⵜⵕⵉⵕⴹⵜ ‘’GON H2 Valley” ⵏⵏⴰ ⵉⵡⴰⵜⵜⵙⵏ ⴰⴼⴰⵔⵙ ⵏ ⵓⵀⵉⴷⵕⵓⵊⵉⵏ ⴰⵣⴳⵣⴰⵡ ⴷ ⵜⵥⴹⴰⵕⵜ ⵉⵖⵓⵙⵏ. ⴰⵢⵍⵍⵉ ⵔⴰⴷ ⵢⴰⵊⵊ ⵜⴰⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ ⴷ ⴰⵎⵎⴰⵙ ⴰⵏⴰⵎⵓⵔ ⴷ ⵓⵎⴰⴹⵍⴰⵏ ⴳ ⵢⵉⴳⵔ ⴰⴷ ⴰⵎⵣⵡⴰⵔ. ⵙⴳ ⵜⵙⵜⵕⴰⵜⵉⵊⵉⵜ ⴰⴷ, ⵔⴰⴷ ⵢⵉⵍⵉ ⵓⵙⴷⵓⵙ ⵏ ⵉⵙⵍⵍⵡⵉ ⴰⵜⵉⴽⵏⵓⵍⵓⵊⵉ ⴷ ⵓⵙⵎⵙⵙⵉ ⵏ ⵉⵖⴱⵓⵍⴰ ⵏ ⵜⵥⴹⴰⵕⵜ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵜⴷⵎⵙⴰ ⵜⴰⵣⴳⵣⴰⵡⵜ, ⵉⵙⵙⴷⵓⵙ ⵜⵉⴳⵎⵉ ⵜⴰⵙⵓⵍⴰⵏⵜ.